Lög VM – Félags vélstjóra og málmtæknimanna 

Kafli I – Nafn og tilgangur

1. gr. Nafn félagsins, varnarþing og félagssvæði
Félagið heitir VM – Félag vélstjóra og málmtæknimanna. VM er stéttar- og fagfélag.
Lögheimili þess og varnarþing er í Reykjavík. Félagssvæðið er Ísland.

2. gr. Tilgangur

Tilgangur félagsins er að efla kjör félagsmanna, stuðla að auknum réttindum þeirra og bættu vinnuumhverfi. Félagið gerir kjarasamninga fyrir hönd félagsmanna sinna og kemur fram fyrir þeirra hönd gagnvart hlutaðeigandi aðilum, svo sem hinu opinbera, samtökum atvinnurekenda og öðrum að því er varðar hagsmuni félagsmanna. Þá skal félagið koma að fræðslu fyrir félagsmenn sína og auka þannig þekkingu og hæfni þeirra í starfi.

3. gr. Stjórnmálaafskipti
Félagið er óháð og styður enga stjórnmálahreyfingu.

Kafli II – Félagsaðild og félagsmenn

4. gr. Félagsaðild

Félagið er opið öllum sem lokið hafa viðurkenndu vélstjórnarnámi, iðnnámi í málm- og véltæknigreinum, bílgreinum, veiðafæragerð, blikksmíði, báta- og skipasmíði svo og öðrum þeim sem starfa í greinunum.

Félagsmenn geta einnig orðið þeir sem vinna að málefnum félagsins og stjórn metur hæfa hverju sinni.

Félagar geta bæði verið launamenn og sjálfstætt starfandi á vinnumarkaði. Sjálfstætt starfandi á vinnumarkaði geta orðið félagsmenn með takmörkuðum réttindum samkvæmt reglum einstakra sjóða auk þess sem þeir njóta ekki kjörgengis í félaginu. Sjálfstætt starfandi og/eða eigendur fyrirtækja eiga ekki rétt á að greiða atkvæði um kjarasamninga eða verkföll.

Sjálfstætt starfandi telst sá sem ber að áætla sér reiknað endurgjald samkvæmt ákvörðun skattayfirvalda, auk þeirra sem skráðir eru sem launamenn hjá eigin fyrirtæki, enda hafa þeir þannig ráðandi stöðu vegna eignar- eða stjórnunaraðildar. Þar sem sjálfstætt starfandi, og/eða fjölskyldumeðlimur rekstraraðila, teljast hafa ráðandi stöðu skulu iðgjöld þeirra ávallt vera greidd og í skilum ef sækja á þjónustu til félagsins eða réttindi í sjóðum félagsins.

5. gr. Félagsmenn

Aðild félagsmanna að félaginu getur verið eftirfarandi:

Fullgildir félagar eru þeir félagsmenn sem njóta allra þeirra réttinda sem aðild að félaginu felur í sér og lög þessa kveða á um.

Hlutdeildarfélagar eru þeir félagsmenn sem njóta sömu réttinda og fullgildir félagar, að frátöldu kjörgengi og kosningarétti í kosningum um verkföll og kjarasamninga. Sjálfstætt starfandi félagsmenn falla í þennan flokk félagsaðildar, sem og þeir sem óska sérstaklega eftir slíkri aðild.

Aukafélagar eru þeir félagsmenn sem hafa aðgengi að viðburðum félagsins með málfrelsi og geta sótt um orlofshús samkvæmt reglum orlofssjóðs. Að öðru leyti njóta þeir ekki sérstakra réttinda samkvæmt lögum þessum.

Aldursfélagar eru þeir félagsmenn sem eru hættir störfum vegna aldurs, slysa, veikinda eða örorku. Þeir halda áunnum réttindum sínum hjá félaginu og sjóðum þess að frátöldu kjörgengi og kosningarétti í kosningum um verkföll og kjarasamninga.

Heiðursfélagar eru þeir félagar sem aðalfundur félagsins hefur skipað sem slíka samkvæmt reglum félagsins. Heiðursfélagar njóta allra sömu réttinda og fullgildir félagar.

Félagsmenn skulu auðkenndir í félagsskrá eftir því hvers eðlis félagsaðild þeirra er.

6. gr. Innganga

Umsækjendur um félagsaðild skulu óska aðildar að félaginu með inntökubeiðnum eða með skilum á gjöldum til félagsins. Aðild nýrra félagsmanna að félaginu skal staðfest af skrifstofu félagsins og skal félagið senda viðkomandi tilkynningu um staðfestingu á inngöngu í félagið. Geri hann ekki athugasemdir um aðild innan þriggja vikna frá dagsetningu skal skráningin standa. Ekki er þörf sérstakrar staðfestingar ef viðkomandi hefur áður greitt til félagsins. Sé vafi um rétt til aðildar skal stjórn úrskurða um málið. Unnt er að skjóta þeirri ákvörðun til fulltrúaráðs.

Um iðgjöld þeirra sem ekki kjósa að gerast félagsmenn, gilda ákvæði kjarasamninga félagsins á hverjum tíma. Nýjum félagsmönnum sem óska aðildar að félaginu er skylt að veita upplýsingar um starfssvið, áætlaðar tekjur og gögn frá opinberum aðilum til staðfestingar á tekjum sé þess óskað.

Þegar umsækjandi hefur gerst félagsmaður telst hann bundinn af lögum félagsins og samþykktum, eftir því sem við á.

7. gr. Félagsgjöld

Félagsgjöld eru 0,8% af heildarlaunum.

Fullgildir félagar og hlutdeildarfélagar greiða fullt félagsgjald.

Aukafélagar greiða félagsgjald sem ákveðið er af stjórn félagsins.

Heiðurs- og aldursfélagar eru undanskildir félagsgjaldi.

8. gr. Úrsögn

Úrsögn úr félaginu skal vera skrifleg og afhent skrifstofu félagsins.

Enginn getur sagt sig úr félaginu eftir að kröfugerð í vinnudeilu hefur verið vísað til ríkissáttasemjara og þar til samningar hafa öðlast gildi.

Úrsögn úr félaginu hefur ekki áhrif á greiðsluskyldu félagsgjalda vegna þess tíma sem félagsmaður var í félaginu.

Hafi félagsmaður ekki greitt félagsgjald samfellt í sex mánuði telst hann ekki lengur eiga aðild að félaginu nema í þeim tilvikum þegar um aldurs- og/eða heiðursfélaga er að ræða.

Áður en félagsmaður er tekinn af félagaskrá skal honum tilkynnt það skriflega með sanngjörnum fyrirvara.

9. gr. Brottvikning

Stjórn félagsins getur áminnt eða vikið úr félaginu félagsmanni sem að hennar áliti brýtur gegn lögum félagsins, samningum þess við vinnuveitendur eða vinnur gegn hagsmunum félagsins. Ákvörðun stjórnar getur viðkomandi félagsmaður vísað til fulltrúaráðs og þarf 2/3 hluta greiddra atkvæða á fulltrúaráðsfundi til staðfestingar.

Brottvikningu má einungis beita þegar sakir eru miklar eða brot sem hefur verið áminnt fyrir áður er endurtekið.

Félagsmaður, sem er vikið úr félaginu, á ekki kost á inngöngu að nýju nema stjórn samþykki inngöngu.

Kafli III – Réttindi og skyldur félagsmanna

10. gr. Réttindi

Réttindi félagsmanna eru, nema annað sé tekið fram í lögum þessum:

1. Forgangsréttur til starfa í samræmi við starfsréttindi, kjarasamninga og lög.
2. Málfrelsi, tillögu- og atkvæðaréttur á fundum félagsins og við allsherjaratkvæðagreiðslur ásamt kjörgengi til trúnaðarstarfa.
3. Réttur til styrkja úr sjóðum félagsins samkvæmt reglum þeirra sjóða.
4. Réttur til orlofsaðstöðu samkvæmt reglum um orlofssjóð.
5. Þátttaka í fræðslustarfi á vegum félagsins.
6. Upplýsingar um launakjör, atvinnuréttindi og atvinnumöguleika.
7. Þjónusta og aðstoð félagsins við að ná fram samnings- og félagsréttindum.

Stjórn félagsins skal vera heimilt er veita námsmönnum samkvæmt 4. gr. laga þessara undanþágu til að halda áunnum réttindum meðan á námi stendur.

11. gr. Skyldur

Skyldur félagsmanna eru að:

1. Hlíta lögum félagsins, fundarsköpum og fundarsamþykktum og samningum sem félagið hefur gert.
2. Greiða félagsgjald.
3. Tilkynna til félagsins brot á samningum.
4.  Vinna af heilindum fyrir félagið.

Kafli IV – Stjórn, fulltrúaráð og nefndir

12. gr. Stjórn

Stjórn félagsins skal skipuð níu einstaklingum, það er formanni og átta meðstjórnendum. Þá skulu vera átta stjórnarmenn til vara.

Formaður skal kosinn til fjögurra ára en aðrir stjórnarmenn og varastjórnarmenn skulu kjörnir til tveggja ára.

Einn meðstjórnenda skal kosinn varamaður stjórnar. Kosningin skal vera leynileg ef einn stjórnarmaður óskar eftir því. Nú tekur varaformaður við störfum formanns og velur þá stjórnin sér nýjan varaformann úr sínum hópi.

13. gr. Störf stjórnar

Stjórn félagsins stýrir málefnum félagsins milli félags- og aðalfunda.

Stjórnin vinnur að stefnumótun fyrir félagið og framgangi þeirra mála sem félagið hefur sett sér að vinna að.

Stjórnin sér til þess að skipulag og starfsemi félagsins sé í góðu horfi og í samræmi við lög félagsins. Stjórn ber ábyrgð á fjárreiðum og eignum félagsins og sér til þess að fjármál félagsins séu jafnan í góðu horfi. Stjórnin tekur allar meiriháttar ákvarðanir sem snúa að fjármálum, samanber þó 21. grein.

Stjórn félagsins skal setja sér og stjórnum allra sjóða og nefnda samkvæmt 16. gr. starfsreglur. Þá skal stjórn vera skylt að sjá til þess að starfsmenn félagsins hafi starfslýsingu og ráðningasamning.

Stjórn skal í samstarfi við launanefnd leggja fyrir aðalfund tillögu um stjórnarlaun fyrir komandi ár.

Starfsmenn félagsins aðrir en formaður skulu vera utan stjórnar félagsins.

Á fyrsta fundi nýrrar stjórnar, eða svo fljótt sem verða má, skal taka fyrir eftirfarandi málefni:

1. Kosning varaformanns stjórnar samkvæmt 12 grein.
2. Ákvörðun um félagsgjald aukafélaga samkvæmt 7. grein.
3. Skipun fulltrúaráðs samkvæmt 15. grein.
4. Skipun starfsnefnda samkvæmt 16. grein

14. gr. Stjórnarfundir

Formaður boðar til stjórnarfunda og stýrir þeim. Varaformaður gegnir skyldum formanns í forföllum hans. Óski þrír eða fleiri stjórnarmenn skriflega eftir því að stjórnarfundur verði haldinn er formanni skylt að verða við þeirri ósk enda sé tilgreint hvert fundarefnið sé.

Stjórn heldur fundi svo oft sem þörf er á og eru fundir stjórnar lögmætir þegar a.m.k. sjö stjórnarmenn sitja fund. Meirihluti atkvæða ræður úrslitum um afgreiðslu mála. Heimilt er að halda stjórnarfundi með aðstoð fjarfundabúnaðar.

Formaður sér til þess að fundir stjórnar séu skráðir og fundargerðir varðveittar á öruggan hátt.

15. gr. Fulltrúaráð

Í félaginu starfar fulltrúaráð sem er stjórn félagsins til ráðgjafar og stuðnings við ýmis stærri málefni í starfsemi félagsins, svo sem stefnumótun, kjarasamninga og meiriháttar framkvæmdir á vegum félagsins.

Fulltrúaráð skal skipað stjórnarmönnum og varastjórn félagsins, trúnaðarmönnum auk allt að 10 félagsmönnum sem stjórn félagsins skipar og skal skipunartími þeirra vera sá sami og stjórnar.

Formaður félagsins er formaður fulltrúaráðs. Skal hann boða til fundar þess eftir þörfum, þó eigi sjaldnar en einu sinni á hverju ári. Heimilt skal að halda fulltrúaráðsfundi með aðstoð fjarfundabúnaðar.

 16. gr. Starfsnefndir

Fagnefnd sjómanna skal fylgjast með kjörum sjómanna og eiga aðild að kjarasamningsgerð vegna þeirra. Þá skal hún fjalla um sérstök hagsmunamál sjómanna og gera tillögur í tengslum við þau til stjórnar. Starfsmaður félagsins skal vera nefndinni til ráðuneytis.

Lífeyrissjóðanefnd skal fjalla um lífeyrissjóðsréttindi félagsmanna, gæta hagsmuna þeirra í lífeyrissjóðakerfinu og gera tillögur til stjórnar félagsins í því sambandi. Þá skal hún gera tillögu til stjórnar félagsins um fulltrúa fyrir aðalfundi lífeyrissjóðanna. Starfsmaður félagsins skal vera nefndinni til ráðuneytis.

Launanefnd skal gera tillögu að launum og starfskjörum formanns, stjórnarmanna og framkvæmdastjóra, sem síðan þarf samþykki stjórnar og eftir atvikum aðalfundar. Launanefnd skal skipuð þremur stjórnarmönnum félagsins.

Laganefnd skal taka til umfjöllunar þær tillögur að laga- og reglugerðarbreytingum sem berast skrifstofu félagsins í aðdraganda aðalfunda. Þá skal nefndin gera sjálf tillögur til stjórnar félagsins um laga- og reglugerðarbreytingar. Starfsmaður félagsins skal vera nefndinni til ráðuneytis.

Orlofsnefnd skal fjalla um framtíðarskipulag, rekstur og viðhald íbúða og orlofshúsa, orlofssvæða félagsins og gera tillögur til stjórnar í því sambandi. Starfsmaður félagsins skal vera nefndinni til ráðuneytis.

Stjórn félagsins er jafnframt heimilt að koma á fót öðrum fag- og starfsnefndum til að vinna að hagsmunamálum félagsmanna og einstakra faghópa í þágu félagsins.

17. gr. Samninganefndir

Stjórn félagsins skipar formenn samninganefnda félagsins vegna þeirra kjarasamninga sem félagið er aðili að í samráði við þá félagsmenn sem starfa eftir viðkomandi samningi.

Aðrir fulltrúar samninganefnda eru valdir af þeim félagsmönnum sem starfa samkvæmt viðkomandi samningi en þeir geta þó falið stjórn félagsins að annast samningagerð.

18. gr. Trúnaðarmenn

Formaður, fyrir hönd félagsstjórnar, skal staðfesta kjör trúnaðarmanna og tilkynna það atvinnurekanda. Trúnaðarmenn skulu starfa eftir erindisbréfi er stjórn félagsins setur þeim. Trúnaðarmenn skulu hafa eftirlit með að lögum félagsins, samþykktum og samningum sé hlýtt. Trúnaðarmenn eru tengiliðir starfsmanna á viðkomandi vinnustað við stjórn og starfsmenn félagins og eiga þeir rétt á aðstoð stjórnar og starfsmanna í störfum sínum. Að öðru leyti fer um starfsemi, réttindi og skyldur trúnaðarmanna að lögum og kjarasamningum félagsins.

Kafli V – Rekstur og fjármál

19. gr. Framkvæmdastjóri

Stjórn félagsins er heimilt að ráða framkvæmdastjóra sem hefur með höndum stjórn á daglegum rekstri félagsins og kemur fram fyrir þess hönd í öllum málum sem varða venjulegan rekstur. Hann sér um reikningshald og ráðningu starfsliðs. Framkvæmdastjóra ber að veita stjórnarmönnum og endurskoðendum allar upplýsingar um rekstur félagsins sem þeir kunna að óska eftir og veita ber samkvæmt lögum.

20. gr. Fjármál

Sjóðir félagsins eru Félagssjóður, Sjúkrasjóður, Orlofssjóður, Fræðslusjóður, Vinnudeilusjóður, Akkur og Minningarsjóður VM.

Allir sjóðir félagsins, aðrir en Félagssjóður, starfa samkvæmt sérstökum reglugerðum sem aðalfundur samþykkir. Í reglugerðum sjóða skal koma fram hlutverk þeirra, tekjustofnar, hvernig fé þeirra skal varið og sjóðunum skuli stjórnað.

Stjórn félagsins skal sjá um ávöxtun þeirra sjóða sem ekki hafa sérstakar stjórnir. Stjórn félagsins og stjórnir einstakra sjóða þess skulu ávaxta sjóði á öruggan og hagkvæman hátt.

Af félagsgjöldum skal greiddur kostnaður við rekstur félagsins og önnur þau útgjöld sem samþykktir félagsins hafa í för með sér. Stjórn félagsins skal sjá til þess að gerðar séu fjárhags- og rekstraráætlanir fyrir starfsemi félagsins og að unnið sé eftir þeim. Stjórnin skal leita samþykkis félagsfundar um fjármálaráðstafanir sem nema hærri fjárhæð en 10% af eignum Félagssjóðs við lok síðasta reikningsárs. Tillögur þess efnis verða einungis teknar til umfjöllunar og afgreiðslu á félagsfundi ef þeirra hefur verið getið í fundarboði og þeim fylgja skriflegur rökstuðningur þar sem fram kemur bæði nauðsyn fjárfestingarinnar fyrir félagið og mat á fjárhagslegri getu þess til að standa straum af henni.

Reikningsárið er almanaksárið.

21. gr. Reikningar

Stjórn félagsins leggur fram reikninga félagsins sem eru endurskoðaðir og áritaðir af stjórn félagsins, framkvæmdastjóra og löggiltum endurskoðanda í lok uppgjörs hvers reikningsárs. Reikningar félagsins ásamt skýrslu stjórnar eru lagðir fram til skoðunar fyrir félagsmenn á skrifstofu félagsins viku fyrir aðalfund.

Kafli VI – Fundir

22. gr. Aðalfundir

Aðalfundur félagsins skal haldinn fyrir lok apríl ár hvert og skal hann boðaður með minnst fjögurra vikna fyrirvara með auglýsingum á heimasíðu félagsins og einnig með rafrænum hætti, t.d. tölvupósti eða vefsíðu félagsins. Stjórn félagsins skal kynna félögum dagskrá fundarins og önnur málefni sem hún hyggst leggja fyrir fundinn með minnst viku fyrirvara. Málefni sem félagsmenn óska eftir að tekin verið til umræðu á fundinum skulu þeir kynna stjórn félagsins með minnst tveggja vikna fyrirvara. Fundurinn getur þó tekið fyrir mál borin upp með styttri fyrirvara, að fengnu samþykki 2/3 hluta greiddra atkvæða á fundinum.

Stjórn er heimilt að ákveða að aðalfundur verði haldinn rafrænt, hvort heldur í heild eða að hluta, enda sé tækni sú sem nýtt er til fundarins örugg að mati stjórnar. Ákvörðunar um að aðalfundur skuli haldinn rafrænt skal getið í fundarboði auk þess sem þar skulu koma fram nauðsynlegar upplýsingar svo félagsmenn geti tekið þátt í fundinum.

Aðalfundur hefur æðsta vald í málefnum félagsins.

Á aðalfundi skulu eftirfarandi mál tekin fyrir:

1. Skýrsla stjórnar um rekstur og starfsemi félagsins síðastliðið rekstrarár.
2. Staðfesting ársreiknings félagsins og sjóða.
3. Kynning rekstraráætlunar félagsins vegna yfirstandandi rekstrarárs.
4. Kosning löggilts endurskoðanda.
5. Ákvörðun stjórnarlauna.
6. Lagabreytingar og reglugerðir.
7. Gerð grein fyrir úrslitum stjórnarkjörs.
8. Kosning í stjórnir sjóða.
9. Kosning kjörstjórnar.
10. Kosning uppstillingarnefndar.
11. Önnur mál.

Formaður félagsins setur aðalfund og lætur fara fram kosningu fundarstjóra og fundarritara.

Aukaaðalfundur skal haldinn ef félagsstjórn telur það nauðsynlegt. Allar sömu reglur gilda um boðun og framkvæmd aukaaðalfundar og hinn árlega aðalfund enda hefur hann sama vald.

23. gr. Félagsfundir

Almennir félagsfundir eru haldnir eins oft og þurfa þykir.

Stjórn félagsins er skylt að boða til félagsfundar þegar minnst 50 félagsmenn krefjast þess skriflega og tilgreina dagskrárefni. Félagsfundur telst lögmætur ef hann er boðaður með minnst þriggja daga fyrirvara og skal boða til hans með sama hætti og aðalfundar. Stjórn er heimilt að ákveða að félagsfundur verði haldinn rafrænt og skal þá gæta að sömu sjónarmiðum og við boðun aðalfundar.

Lögmætir félagsfundir hafa æðsta vald í málefnum félagsins milli aðalfunda innan þeirra takmarka sem lögin setja.

Kafli VII – Kosningar

24. gr. Allsherjaratkvæðagreiðsla

Allsherjaratkvæðagreiðslu skal viðhafa:

1. Við kosningu stjórnar.
2. Við kosningu formanns.
3. Við slit á félaginu.
4. Þegar lögmætur félagsfundur samþykkir að viðhafa allsherjaratkvæðagreiðslu í félaginu um tiltekin mál.

Allsherjaratkvæðagreiðsla fer fram með leynilegri rafrænni atkvæðagreiðslu meðal félagsmanna nema sérstakar ástæður hamli.

25. gr. Kjörstjórn

Kjörstjórn skal vera starfandi í félaginu og skal hlutverk hennar vera að annast framkvæmd allra almennra atkvæðagreiðslna innan félagsins samkvæmt lögum þessum.

Kjörstjórnin skal kosin af aðalfundi og í henni skulu eiga sæti tveir einstaklingar og tveir til vara. Við framkvæmd atkvæðagreiðslna um kjarasamninga og verkföll skipar stjórn félagsins þriðja kjörstjórnarmanninn og skal hann vera formaður kjörstjórnar.

Við framkvæmd annarra atkvæðagreiðslna á vegum félagsins skal miðstjórn ASÍ skipa þriðja kjörstjórnarmanninn og skal hann vera formaður kjörstjórnar.

Nema annað sé ákveðið í lögum þessum skal kjörstjórn, að höfðu samráði við stjórn félagsins, ákveða hverju sinni með hvaða hætti atkvæðagreiðsla fer fram, svo sem með handauppréttingu, með leynilegri skriflegri atkvæðagreiðslu eða með rafrænum hætti.

Kjörstjórn skal setja vinnureglur um framkvæmd kosninga í samræmi við 24. og 26. gr. laga þessara.

Meðlimir kjörstjórnar eru bundnir þagnarskyldu um úrslit kosninga þar til þau hafa verið birt.

26. gr. Kosningar í stjórn og nefndir

Í uppstillingarnefnd skulu eiga sæti fimm einstaklingar sem kosnir eru af aðalfundi. Hlutverk uppstillingarnefndar skal vera að kalla eftir framboðum til formanns, stjórnar og annarra embætta sem kosið er til á aðalfundi félagsins. Berist fleiri framboð heldur en embætti sem kosið er í, skal uppstillingarnefnd skila tillögum sínum að kjöri í viðeigandi embætti og skulu tillögurnar berast stjórn félagsins eigi síðar en tveimur vikum fyrir aðalfund. Í störfum sínum skal nefndin kappkosta við að taka tillit til starfsgreina og landssvæða þannig að frambjóðendur endurspegli breidd félagsins. Stjórn skal kynna félagsmönnum niðurstöður uppstillingarnefndar þegar þær liggja fyrir.

Framboð skulu berast skrifstofu félagsins með skriflegum hætti eigi síðar en þremur vikum fyrir boðaðan aðalfund.

Að undanskildum heiðursfélögum skulu þeir einir vera kjörgengir sem hafa greitt félagsgjald síðustu sex mánuði áður en framboðsfrestur rennur út.

Um formann skal kosið sérstaklega og skal fjöldi atkvæða ráða kjöri.

Við stjórnarkosningu skal kjósa allt að átta frambjóðendur og skulu þeir átta frambjóðendur sem hljóta flest atkvæði teljast réttkjörnir til aðalstjórnar en þeir átta sem á eftir koma teljast réttkjörnir til varastjórnar. Fjöldi atkvæða skal ráða röð varastjórnarmanna og ef atkvæði eru jöfn þá skal hlutkesti ráða röð þeirra.

Kosning skal vera rafræn og skal hefjast eigi síðar en tveimur vikum fyrir aðalfund og skal henni ljúka eigi síðar en tveimur sólarhringum fyrir aðalfund. Við kosninguna skal gæta reglna ASÍ um verklag við rafrænar atkvæðagreiðslur eftir því sem við á.

Kjörstjórn skal tilkynna stjórn félagsins um niðurstöður kosninga þegar þær liggja fyrir og skulu þær birtar félagsmönnum í kjölfarið.

Kafli VIII – Lagabreytingar

27. gr. Lagabreytingar

Lögum félagsins verður ekki breytt nema á lögmætum aðalfundi og með samþykki 2/3 hluta greiddra atkvæða. Auðir og ógildir seðlar teljast ekki til greiddra atkvæða. Tillögur um lagabreytingar þurfa að berast stjórn félagsins eigi síðar en þremur vikum fyrir aðalfund. Lagabreytingar öðlast gildi í samræmi við lög ASÍ.

28. gr. Réttaráhrif aðildar að ASÍ

Lög Alþýðusambands Íslands eins og þau eru á hverjum tíma eru lögum þessum til fyllingar. Gilda ákvæði þeirra þar sem lögum þessum sleppir en skarist lögin gilda ákvæði laga ASÍ.

29. gr. Slit félagsins o.fl.

Félaginu verður ekki slitið nema 2/3 hlutar greiddra atkvæða í allsherjaratkvæðagreiðslu séu fylgjandi félagsslitum. Auðir og ógildir seðlar teljast ekki til greiddra atkvæða.

Lokafundur í félaginu skal ráðstafa sjóðum þess.

30. gr. Sameining við annað félag

Félagið verður ekki sameinað öðru félagi nema 2/3 hlutar greiddra atkvæða í allsherjaratkvæðagreiðslu séu fylgjandi sameiningunni. Auðir og ógildir seðlar teljast ekki til greiddra atkvæða.

35. gr. Gildistaka
Þannig samþykkt á aðalfundi VM 11. apríl 2024.

Lög VM í pdf skjali