8.12.2015

Okkar mönnum er hótað!

„Það er undarleg staða komin í umhverfi sjávarútvegsins, og allar tilraunir okkar til að spyrna við fótum á móti þeim breytingum sem útgerðirnar setja einhliða um borð í skipunum, er unnið á móti með öllum ráðum af hálfu útgerðanna. Okkar félagsmenn hafa ekki lengur stöðu til að hafa skoðun eða setja fram sýnar kröfur án hótanna,“ segir Guðmundur Þ. Ragnarsson, formaður VM.

„Við vitum að mönnum hefur ekki aðeins verið hótað brottrekstri frá viðkomandi útgerð, heldur útilokun um ráðningu hjá öðrum útgerðum innan SFS. Við glímum nú við nýja tegund útgerðarmanna. Ég hef ekki kynnst neinu slíku frá því ég byrjaði að vinna við samningagerð. Það eru kannski sjö stórar útgerðir sem ráða öllu og staðan er sú að sjómenn andmæla ekki Þorstein Má í Samherja, Gunnþóri í Síldarvinnslunni, eða þeim á Höfn eða í Vestmannaeyjum. Þetta er veruleikinn sem við glímum við.“

Sjómenn hafa verið með lausa samninga í rétt tæp fimm ár, eða frá 1. janúar 2011. „Vonbrigði okkar nú eru ekki minni fyrir þær sakir að þeir áttu frumkvæði að þeim viðræðum sem þó voru í gangi. Þegar á reyndi vildu þeir ekkert gera. Frá 2011 höfum við hækkað launaliði í takt við samninga sem hafa verið gerðir á vinnumarkaði. En ekki nú, þeir telja laun hafa hækkað umfram það sem þeir geti sæst á.“

Guðmundur segir margt þurfa að ræða. Ekki síst verðlagsmál og mönnun skipanna. „Það eru ekki nema átta menn á þessum stórum skipum þegar þau eru á trolli. Nú vill útgerðin að það verði ekki kokkur þegar átta menn eða færri eru um borð. Þeir telja sig hafa einhverja tækni sem komi í stað kokksins. „Þessir men eru í einhverskonar fílabeinsturni fastir í exel- útreikningum.“

VM mun boða til funda milli jóla og nýárs. „Við viljum hitta sem flesta félagsmenn og við munum ræða þá staðreynd að það mun ekkert fást frá útgerðinni nema henni verði stillt upp við vegg.“