18.12.2015

ÍSAL endurnýjaði samninginn fyrir einu ári

Rafmagnssamningur Landsvirkjunar og Rio Tinto Alcan gildir til ársins 2036. Samningurinn var undirritaður árið 2010 og þegar hann var gerður réðust bæði fyrirtækin í umfangsmiklar fjárfestingar. Hann var nýlega endurskoðaður, í desember 2014, með óbreyttum samningstíma. Rafmagnssamningurinn er hagstæður fyrir báða aðila og tryggir álverinu rafmagn á samkeppnishæfum kjörum til langs tíma. Rafmagnssamningurinn er í fullu gildi, enginn ágreiningur er milli fyrirtækjanna um efni hans, engin tilkynning hefur borist um að aðilar hyggist ekki standa við skuldbindingar samningsins og engar viðræður standa yfir um breytingar á honum.
Þetta segir Landsvirkjun. Alla fréttatilkynningu Landsvirkjunar vegna málsins er hægt að lesa hér:

Ástæða er til að ítreka ályktun stjórnar VM vegna átaka við Rio Tinto Alcan. „Fyrirtæki eins og Rio Tinto verður að átta sig á því að með því að standa í vegi fyrir eðlilegum launahækkunum til starfsmanna sinna þá er það ekki aðeins að valda sér fjárhagslegum skaða.“
Ályktunin hljómar svona:

Ályktun stjórnar VM – Félags vélstjóra og málmtæknimanna
vegna deilunnar í ÍSAL

Stjórn VM – Félags vélstjóra og málmtæknimanna fordæmir vinnubrögð Rio Tinto, eigenda álversins í Straumsvík fyrir framkomu þess í garð starfsmanna fyrirtækisins.
Að fyrirtækið sé tilbúið að valda sér ómældu fjárhagslegu tjóni til að ná lægst launuðu störfunum í verktöku, vekur upp þá spurningu að eitthvað annað búi að baki.

Fyrirtæki eins og Rio Tinto verður að átta sig á því að með því að standa í vegi fyrir eðlilegum launahækkunum til starfsmanna sinna þá er það ekki aðeins að valda sér fjárhagslegum skaða, heldur um leið er fyrirtækið að byggja upp almenna andúð á alþjóðlegum auðhringjum. Það hlýtur að kalla á að við höfum skoðun á því hverskonar fyrirtæki við viljum að starfi hér á landi.

Stjórn VM skorar á almenning og alla þá sem skoðun hafa á deilunni að lýsa yfir fullum stuðningi við starfsmenn og stéttarfélög sem standa í átökum við Rio Tinto auðhringinn.
Sýnum eigendunum að við látum ekki beygja okkur né þvinga líkt og þeir hafa náð fram víðsvegar um heiminn þar sem fyrirtækið starfar. Við viljum ekki þeirra hugmyndafræði inn á íslenskan vinnumarkað.