Þetta eru meðal helstu niðurstaðna rannsóknarinnar Konur í karllægum greinum sem byggir á svörum 222 kvenna innan RSÍ og VM. Markmið rannsóknarinnar var að varpa ljósi á stöðu og reynslu kvenna í karllægum greinum á íslenskum vinnumarkaði, en lítið hefur áður verið rannsakað um þann hóp.

Spurningakönnunin var send til 949 kvenna og var svarhlutfallið 23,4 prósent. Könnunin var opin frá 11. desember 2025 til 7. janúar 2026. Spurt var meðal annars um starfsumhverfi, vinnustaðamenningu, starfsframa, samspil vinnu og fjölskyldulífs og reynslu af einelti og áreitni.

Í niðurstöðunum kemur fram að tveir þriðju svarenda hafi orðið fyrir meiðandi atvikum eða athugasemdum í vinnu og 44 prósent hafi orðið vitni að einelti eða kynbundinni eða kynferðislegri áreitni á vinnustað. Þá segjast um fjórar af hverjum tíu hafa upplifað að faglegt mat þeirra hafi verið hundsað og þriðjungur hefur verið særður eða niðurlægður fyrir framan aðra.

Í rýnihóparannsókn sem lagði grunn að könnuninni lýstu konur krefjandi starfsaðstæðum og karllægri vinnustaðamenningu þar sem þær þyrftu oft að sanna hæfni sína. Einnig kom fram að skipulag vinnutíma væri í mörgum tilvikum miðað við aðstæður karla sem gæti gert konum erfiðara fyrir, meðal annars í tengslum við fjölskyldulíf og barneignir.